वासिङ्टन — अमेरिकाका पूर्व राष्ट्रपति डोनाल्ड ट्रम्पको नेतृत्वमा प्रस्तावित नयाँ विधेयकले गैरआप्रवासी भिसा (जस्तै पर्यटन, अध्ययन तथा काम) शुल्कमा ठुलो वृद्धि गर्ने भएको छ। सन् २०२६ देखि लागू हुने यस विधेयकमा अधिकांश गैरआप्रवासी भिसा प्रकारमा अतिरिक्त २५० अमेरिकी डलर “भिसा इन्फ्रास्ट्रक्चर शुल्क” (Visa Integrity Fee) थपिने प्रावधान गरिएको छ।
यो विधेयकमा अमेरिकी हाउस जुडिसियरी समितिका रिपब्लिकन सांसदहरूले कुल २२ वटा नयाँ आप्रवासन शुल्कहरू प्रस्ताव गरेका छन्, जसको उद्देश्य “विदेशी नागरिकहरूलाई कानुनी प्रक्रियामा रहन प्रोत्साहित गर्नु” रहेको दाबी गरिएको छ। तर आलोचकहरूले भने यो कदम अन्तर्राष्ट्रिय आगन्तुकहरूलाई निरुत्साहित गर्ने र अमेरिकी अर्थतन्त्रलाई नै घाटा हुने बताएका छन्।
अमेरिकी ट्राभल एशोसिएसनका अध्यक्ष ज्योफ फ्रीम्यानले भने, “कानुनी रूपमा अमेरिका आउने आगन्तुकमाथि शुल्क बढाउनु भनेको हाम्रो एक प्रमुख निर्यात — अन्तर्राष्ट्रिय ट्राभल खर्चमाथि आफैंले लगाएको कर हो।” उनले यसले अमेरिकाको पर्यटन क्षेत्रमा ठूलो नकारात्मक असर पार्ने दाबी गरे।
सन् २०२६ मा अमेरिका, क्यानडा र मेक्सिको संयुक्त रूपमा आयोजना गर्ने फुटबल विश्वकपका लागि अमेरिकी सहरहरू विशेष तयारीमा छन्। तर भिसा शुल्क वृद्धिको सन्देशले लाखौं समर्थकहरूको उपस्थितिमा असर पार्ने डर देखिएको छ। अमेरिकी सहरहरू आफ्ना रंगशालाहरूको आधा सीट विदेशी आगन्तुकले भरिने अपेक्षा गरिरहेका छन्।
यसैबीच ट्रम्प प्रशासनले हाल १२ देशमा लागु गरिएको अमेरिकी प्रवेश प्रतिबन्ध (ट्राभल ब्यान) लाई विस्तार गरी करिब ५० देशमा पुर्याउने तयारी गरेको समाचारले पनि थप चासो पैदा गरेको छ।
भिसा शुल्क वृद्धिको प्रस्तावले विशेष गरी पर्यटक, अन्तर्राष्ट्रिय विद्यार्थी तथा कामदारहरूलाई असर गर्नेछ। धेरैको आशंका छ कि यस्तो शुल्कले अमेरिकाको अन्तर्राष्ट्रिय छवि, व्यापार, शिक्षाक्षेत्र र पर्यटन राजस्वमा नकारात्मक असर पार्न सक्छ। विशेषगरी विश्वकप २०२६ जस्तो अन्तर्राष्ट्रिय मेगा इभेन्टको सन्दर्भमा यस्तो कदम समयअनुकूल नरहेको विज्ञहरूको भनाइ छ।
हाउस जुडिसियरी समितिको प्रेस कार्यालयले ट्राभल एशोसिएसनको दाबीबारे प्रतिक्रिया दिन नसकेको अमेरिकी मिडिया Forbes ले उल्लेख गरेको छ।
 थपिने){kind=link}