अस्ट्रेलियाको सिड्नीको पश्चिमी भागमा रहेको एउटा चाइल्डकेयर सेन्टरमा सुतिरहेका दुई साना बालकहरूलाई खुला हातले थप्पड हानेको गम्भीर आरोप एक चाइल्डकेयर कर्मचारीमाथि लागेको छ। नेपाली नागरिक जयेन्द्र जङ्ग शाही (उमेर: २४) लाई बिहीबार दिउँसो करिब १ बजे पनामिया चाइल्डकेयर सेन्टरमा तीन र चार वर्षका दुई बालकहरूलाई निद्रामा थप्पड हानेको आरोपमा शनिबार गिरफ्तार गरिएको छ।
यो घटना CCTV क्यामेरामा कैद भएको र शाहीमाथि दुई वटा सामान्य आक्रमण (Common Assault) का मुद्दा दर्ता गरिएका छन्। अभियोजन पक्षले जमानतको विरोध गर्दै शाहीबाट समुदाय, विशेषगरी बालबालिकाहरूलाई खतरा रहेको तर्क दियो। पुलिस अभियोजक सम एडवान ले CCTV फुटेजमा देखिएको व्यवहारलाई “अत्यन्त चिन्ताजनक” भनेका छन्। तथापि, अदालतले शाहीको कुनै आपराधिक इतिहास नभएको आधारमा जमानत स्वीकृत गर्यो। जमानतका सर्तहरू निम्नानुसार छन्:
- कुनै पनि चाइल्डकेयर सेन्टरमा प्रवेश पूर्णतः प्रतिबन्धित
- राहदानी जफत गरिएको
- अदालतको आदेशबमोजिम मानसिक स्वास्थ्य उपचार लिनुपर्ने
शाही सात वर्षदेखि अस्ट्रेलियामा बसोबास गर्दै आएका छन् र स्थायी बसोबास (Permanent Residency) पाउने आशामा थिए। उनकी पत्नीले अदालतमा शपथपत्र पेश गर्दै भनेकी छिन् कि परिवारमा हालसालै आइपरेका दुखद घटनाहरूपछि उनको मानसिक स्वास्थ्य बिग्रिएको थियो।
उनका वकिल जेम्स मुर ले अदालतमा भने:
“उनले यो अघि कहिल्यै यस्तो गरेका थिएनन्। हालको घटना र केही दिन थुनामा बसेपछि उनलाई आँखा खुलेको छ। उनले मानसिक स्वास्थ्य सहायता लिन तयार छन् — अदालतको आदेश होस् वा नहोस्।”
यो घटना यस्तो समयमा आएको छ जब अस्ट्रेलियाको चाइल्डकेयर क्षेत्र पछिल्लो १२ महिनामा थरिथरिका विवादहरूले घेरिएको छ, जसमा यौन शोषणका गम्भीर मामिलाहरू पनि समावेश छन्।
यसको सामना गर्न संघीय सरकारले चाइल्डकेयर कर्मचारीहरूका लागि राष्ट्रिय दर्ता प्रणाली, सबै चाइल्डकेयर सेन्टरहरूमा अनिवार्य CCTV राख्ने नीतिमाथि विचार जस्ता कदमहरू उठाएको छ ।
