मुंबई – बलिउडका वरिष्ठ हास्य अभिनेता अस्रानी अब हामीबीच रहनुभएन। ८४ वर्षको उमेरमा उहाँको आइतबार दिउँसो मुम्बईको जुहास्थित भारती आरोग्य निधि अस्पतालमा निधन भएको हो।
निधनअघि केही घण्टामात्रै उहाँले इन्स्टाग्राममा दिपावलीको शुभकामना सन्देश शेयर गर्नुभएको थियो। त्यो उहाँको अन्तिम सार्वजनिक पोस्ट बन्न पुग्यो।
परिवारले जारी गरेको वक्तव्यमा भनिएको छ,
“हामी सबैको अनुहारमा हाँसो ल्याउने हाम्रो प्रिय अस्रानी अब हामीबीच छैनन्। उहाँको निधनले फिल्म क्षेत्र र हाम्रो जीवनमा ठूलो खालीपन छाडेको छ।”
अस्रानीको अन्त्येष्टि सोमबार साँझ सान्ताक्रुजमा पारिवारिक उपस्थितिमा सम्पन्न भएको बताइएको छ।
१९४१ जनवरी १ मा जयपुरमा जन्मिएका अस्रानीले पुणेको फिल्म तथा टेलिभिजन इन्स्टिच्युट अफ इन्डियाबाट अभिनय सिक्नुभएको थियो। सन् १९६० दशकको अन्त्यतिर बलिउड प्रवेश गर्नुभएका उहाँले ५० वर्षभन्दा बढीको करियरमा ३०० भन्दा बढी फिल्ममा काम गर्नुभयो।
१९७५ को सुपरहिट फिल्म शोले मा जेलरको भूमिकामा उहाँले बोलेको संवाद “हम अंग्रेजों के ज़माने के जेलर हैं…” अहिले पनि मानिसका ओठमा झुन्डिएको छ। त्यसपछि भूल भुलैया, अमर अकबर एन्थनी, अपना देश, चलती का नाम गाडी लगायत दर्जनौं हिट फिल्ममा उहाँले दर्शकलाई हसाउनुभयो।
हिन्दी फिल्मसँगै अस्रानीले गुजराती चलचित्रमा पनि काम गर्नुभयो र करिब आधा दर्जन फिल्म निर्देशन गर्नुभयो।
उहाँको निधनको खबर बाहिरिएपछि बलिउडभर शोकको लहर छ। कलाकारहरू अनुपम खेर, परेश रावल, जॉनी लिभरलगायतले अस्रानीलाई सम्झँदै सामाजिक सञ्जालमा भावनात्मक पोस्ट गरेका छन्।
एक जनाले लेखे, “उहाँले सधैं हामीलाई हसाउनुभयो, र आज हामीलाई रुवाएर जानुभयो।”
अस्रानीले दिपावलीको दिन आफ्ना प्रशंसकहरूलाई लेख्नुभएको सन्देश अहिले सबैको मन छोइरहेको छ। उहाँले लेख्नुभएको थियो, “सबैलाई खुशी र उज्यालोले भरिएको दिपावलीको शुभकामना।”
उही सन्देश अब उहाँको अन्तिम सम्झना बनेको छ।
