मेलबर्नको प्रसिद्ध अस्टिन अस्पताल (Austin Hospital) मा कार्यरत एक चिकित्सक (Doctor) माथि गम्भीर आपराधिक अभियोग लगाइएको छ। प्रहरीले २७ वर्षीय चिकित्सकलाई स्टाकिङ (अनुगमन) र गोप्य निगरानी उपकरण प्रयोग गरेको अभियोगमा पक्राउ गरेको हो।
प्रहरीका अनुसार, ३ जुलाई का दिन अस्पतालको कर्मचारीहरू मात्र प्रयोग गर्ने शौचालयमा एक मोबाइल फोनमार्फत रेकर्डिङ गर्ने उपकरण फेला परेको थियो। प्रारम्भिक अनुसन्धानबाट थाहा भएको छ कि उक्त उपकरण त्यहाँ “धेरै समयदेखि” राखिएको थियो, तर केही दिनअघि मात्र कर्मचारीहरूले शंका गरी रिपोर्ट गरेका थिए।
प्रहरीको Mernda Sexual Offence and Child Abuse Investigation Team (SOCIT) ले अनुसन्धानपछि आज १० जुलाई बिहान हाइडलबर्ग वेस्टस्थित एक ठेगानामा छापा मारेर उनलाई पक्राउ गरेको हो।
उनलाई स्टाकिङ र अवैध निगरानीको अभियोगमा मुद्दा दायर गर्दै २९ अगस्टमा हाइडलबर्ग मजिस्ट्रेट अदालतमा उपस्थित गराइने छ।
अस्पताल, बाल हेरचाह केन्द्र र शैक्षिक संस्थाहरू जस्ता स्थानहरू समाजले सधैं विश्वास र सुरक्षाको पर्याय मानेको हुन्छ। तर, यस्ता स्थानमा हुने लुकेका रेकर्डिङ र यौन दुरुपयोगका घटना क्रमशः बढ्दै गएका छन्, जसले समुदायको भरोसा चकनाचुर बनाइरहेको छ।
केही हप्ता अगाडि मेलबर्नमै बाल हेरचाह केन्द्रहरूमा यौन दुर्व्यवहारका घटनाहरू सार्वजनिक भएका थिए। बाल हेरचाह केन्द्र, विद्यालय र स्वास्थ्य संस्थामा बाल यौन दुरुपयोग र लुकेको निगरानी जस्ता घटना सार्वजनिक भइरहेका छन्। यी घटनाले समुदाय सेवामूलक संस्थाहरूप्रति आमजनताको विश्वास गहिरो रूपमा चकनाचुर बनाइरहेको छ।
अझै दुखद पक्ष के छ भने, अभिभावकहरूले आफ्ना बालबालिकालाई सुरक्षित वातावरणको आशामा यस्ता संस्थाहरूमा पठाउँछन्। तर ती संस्थाभित्रै यस्तो गोप्य निगरानी, यौन दुर्व्यवहार वा शोषणका घटनाहरू हुनुले सम्पूर्ण प्रणालीमाथि नै प्रश्न उठाएको छ।
विशेषगरी, यस्ता अपराधहरू कति समयदेखि लुकेर भइरहेको भन्ने सवालले अझ ठूलो चिन्ता उत्पन्न गरेको छ। यदि कर्मचारी शौचालयमै यस्तो उपकरण भेटिएको हो भने, त्यो उपकरण अरू कतिपय स्थानमा पनि प्रयोग भएको हुनसक्ने डर हटेको छैन।
अब अस्पतालमा कार्यरत एक चिकित्सकले नै कर्मचारीहरूको गोपनीयता उल्लङ्घन गर्नु गम्भीर सवाल हो —
-
के अब हामी चिकित्सकजस्ता पेशाकर्मीमाथि पनि विश्वास गर्न सक्दैनौं?
-
के यस्ता संवेदनशील स्थानहरूमा पर्याप्त निगरानी र नीतिगत सुरक्षा व्यवस्था छैन?
समाजले अब यस्ता संस्थामाथि अन्धविश्वास गर्नुको सट्टा नियमित मूल्याङ्कन, कडाइका साथ निगरानी र कानुनी सजगता अपनाउनु आवश्यक छ।
यस घटनाले फेरि एकपटक “सेवा, सुरक्षाको नाममा हुने विश्वासको दुरुपयोग” लाई उजागर गरेको छ।
यो समाचारले सम्पूर्ण अष्ट्रेलियाली समुदायलाई झस्काएको छ र अभिभावक, कर्मचारी तथा सेवाग्राहीहरूलाई सचेत हुन बाध्य बनाएको छ।
