मेलबर्न, अष्ट्रेलिया – एक ७० वर्षीय प्राध्यापकलाई विश्वविद्यालयको कक्षा सञ्चालनको क्रममा कथित रूपमा बाल यौन दुर्व्यवहार सम्बन्धी तस्बिरहरू स्क्रिनमा देखिएपछि पक्राउ गरिएको छ।
मेलबर्नको सिविडी क्षेत्रमा रहेको विश्वविद्यालयमा फेब्रुअरी ५ मा भएको कक्षाको क्रममा ती आपत्तिजनक तस्बिरहरू अनायासै स्क्रिनमा देखिएको आरोप छ। घटनाको जानकारी तुरुन्तै प्रहरीले पाएको थियो।
प्रहरीले मिडल पार्कस्थित घरमा फेब्रुअरीमा खोजतलासी गरी विभिन्न इलेक्ट्रोनिक उपकरणहरू बरामद गरेका थिए। थप अनुसन्धानको क्रममा, फेब्रुअरी १३ मा प्रहरी टोली सिड्नी पुगेको थियो र त्यहाँको पूर्वी क्षेत्रको अर्को घरमा पनि न्यू साउथ वेल्स प्रहरीको सहयोगमा छापा मारिएको थियो।
प्रहरीले ती घरबाट फेला परेका अन्य डिजिटल सामग्रीहरूमाथि अनुसन्धान जारी राखेको जनाएको छ।
प्राध्यापकलाई “कमन्थवेल्थ अपराध अन्तर्गत बाल दुर्व्यवहार सामग्री राखेको एक मुद्दा” र “क्राइम एक्ट अन्तर्गत यस्ता सामग्री राखेको दुईवटा मुद्दा” लगाइएको छ। उनलाई सोधपुछपछि औपचारिक रूपमा आरोप लगाइएको हो।
अब ती व्यक्तिलाई अगस्ट ७ तारिखमा मेलबर्न म्याजिस्ट्रेट अदालतमा उपस्थित गराइने छ। प्रहरीका अनुसार यो घटनासँग सम्बन्धित अन्य व्यक्तिको खोजी हाल भइरहेको छैन।
यो घटनाले विश्वविद्यालयको डिजिटल सुरक्षामाथि प्रश्न उठाएको छ। शैक्षिक संस्थामा यस्ता संवेदनशील सामग्री कसरी देखापर्यो भन्ने विषयमा पनि गम्भीर छानबिन आवश्यक भएको विद्यार्थी संगठनहरूले बताइरहेका छन्।
सावधानी:यस्तो किसिमका घटनामा संलग्न वा प्रभाव पार्ने सामग्रीका सम्बन्धमा तपाईंले केही थाहा पाउनु भएमा नजिकको प्रहरी कार्यालयमा जानकारी गराउनुहोस्। बाल यौन दुर्व्यवहार एउटा गम्भीर अपराध हो।
