लस एन्जलस, अमेरिका — ट्रम्प प्रशासनको कडाईपूर्ण आप्रवासन नीति विरुद्ध जारी विरोध प्रदर्शनका कारण लस एन्जलस सहरका नेताहरूले कर्फ्यु आदेश जारी गरेका छन्।
स्थानीय अधिकारीहरूका अनुसार, पछिल्ला केही दिनदेखि विभिन्न समुदाय र आप्रवासी अधिकारकर्मीहरू सडकमा उत्रिरहेका छन्। प्रदर्शनकारीहरूले ट्रम्प प्रशासनले आप्रवासीहरूमाथि गर्दै आएको क्र्याकडाउन (कडाइ) लाई “अन्यायपूर्ण र विभेदकारी” भन्दै विरोध जनाइरहेका छन्।
प्रदर्शनहरू केही स्थानहरूमा हिंसात्मक बन्न थालेपछि, सार्वजनिक सम्पत्ति र व्यवसायहरूमा क्षति पुगेको रिपोर्ट आएको छ। यसैको प्रतिक्रिया स्वरूप, लस एन्जलस सहरका नेतृत्वले सांझ ८ बजेदेखि बिहान ५ बजेसम्म लागू हुने गरी कर्फ्यु आदेश जारी गरेको हो।
लस एन्जलसका मेयरले एक प्रेस विज्ञप्तिमा भने, “हामी जनताको अभिव्यक्तिको स्वतन्त्रतालाई सम्मान गर्छौं, तर सार्वजनिक सुरक्षा हाम्रो पहिलो प्राथमिकता हो।”
प्रदर्शनको केन्द्रमा रहेका मुद्दाहरूमा आप्रवासीहरूलाई पक्राऊ गरेर देशनिकाला गर्ने प्रक्रिया, शरणार्थी नीति, र डिटेन्सन सेन्टरमा रहेको अमानवीय व्यवहार प्रमुख छन्।
संघीय सरकारको नीतिका कारण धेरै नेपाली, मेक्सिकन, र अन्य समुदायका आप्रवासीहरूमा त्रास फैलिएको छ। विरोधका आवाजहरू बढ्दै जाँदा देशभरका प्रमुख शहरहरूमा प्रदर्शनको लहर फैलिएको छ।
कर्फ्युको उल्लंघन गर्नेहरूलाई जरिवाना वा पक्राउ गरिने अधिकारीहरूले चेतावनी दिएका छन्। यद्यपि शान्तिपूर्ण प्रदर्शनलाई सघाउने प्रयास पनि जारी रहेको जनाइएको छ।